【五個步驟——組織職場手足】

運動發展到今日,大家都明白我哋係要打持久戰,同呢個腐敗嘅政權鬥長命,所以我哋更加要擴大自己嘅力量,團結我哋嘅自己人﹗嚟緊呢個星期會同大家分享吓,點樣組織自己友嘅具體方法,希望大家都可以係自己職場運用啦﹗

  1. 辨認手足: 戴口罩返工、有香港鎖匙扣、有和你返工同快閃嘅活動日子都遲返、留意公司或者同事群組有冇嘢講抗爭議題
  2. 開群組:交流資訊如果有興趣嘅人都可以加入(不過要提防管理層同二五仔)
  3. 從簡單表態開始:戴口罩、放口罩、貼貼紙memo、Airdrop文宣
  4. 進一步組織行動:組團快閃、約埋去集會、一齊諗點支援運動
  5. 組織工會:令自己更有牙力,除咗政治表態,亦關注行業權益,增加職場話語

【組織職場手足(一)辨認手足】

運動發展到今日,大家都明白我哋係要打持久戰,同呢個腐敗嘅政權鬥長命,所以我哋更加要擴大自己嘅力量,團結我哋嘅自己人﹗嚟緊呢個星期會同大家分享吓,點樣組織自己友嘅具體方法,希望大家都可以係自己職場運用啦﹗

第一個步驟就係辨認手足,先壯大自己友,再做遊說其他人嘅工作。以下係兩個小小方法:
1) 善於觀察
最近發起唔少嘅行動,例如:戴黑口罩、陪你返工,所以大家可以細心留意吓有冇巴絲戴住口罩、星期五遲咗返工等等,都有機會係潛在嘅手足。仲有,好多有心人都整咗啲靚靚貼紙、「香港」鎖匙扣等等,大家都可以望吓身邊同事有無啲類似紀念品喺身。
2) 隨心問吓
再者,大家都不妨茶餘飯後多問兩句,隨心一啲,「喂﹗你週末做咗咩﹖」、「你今晚有咩做﹖」,又或者主動啲講:「我星期日去尖沙咀呀」,睇下對方會唔會透露多啲。

當然為咗保護自己,公開嘅程度亦要視乎你間公司嘅氛圍,又或者你上司、腦細係咪藍絲。如果你有其他方法,你就留言俾我哋啦﹗

當抗爭成為日常,我哋更加要組織身邊嘅同路人,無論係去遊行、集會,定社區連儂牆、快閃行動,我哋都一定要更團結,令政權知道,佢再唔回應訴求,我哋係會更團結咁反抗﹗

【組織職場手足(二)開群組,交流資訊】

上回講到要分辨身邊嘅手足,認手足之後,大家就要有個開一個平台去交流,無論係資訊發放定隨心傾下計都重要㗎﹗

平台可以發放一啲同大家關係密切嘅資訊,好似俾大家知道行業集會,又或者上班當區嘅資訊,由具體行動到交通資訊都可以,志在俾大家討論多啲,亦有地方發放運動嘅感受。

喺眾多平台,大家用得最多嘅係telegram,因為可以容易啲隱藏身份,避免白色恐怖,另一邊廂,大家都要提防二五仔同管理層入侵,要定時留意一啲一直保持沉默嘅人,亦要留意群組嘅資訊有冇傳咗俾管理層知﹗

現時有唔少行業嘅tg group, 為咗避免閒人或二五仔入侵,會採取認證程序,就係開設唔公開嘅群組,如果有人想加入,就要pm遮咗個人資料嘅公司員工證俾admin。大家可以按自己嘅行頭大小、公司規模、秋後算帳嘅氣氛等設定門檻㗎﹗不過,提提大家,如果對方原先有你電話,都有機會透過tg知道你身份,所以最保障到大家嘅方法,都真係用幾十蚊買張太空卡,再開tg account!!!

【組織職場手足(三)從簡單行動開始】

記得組織手足嘅目標,係要團結我哋自身嘅力量,再好似雪球咁,越滾越大。

好多時,大家嘅第一步會有啲猶豫,我哋係要了解啲佢哋嘅憂慮,亦都要團結多啲同伴同行,先真正可以令大家安心,所以當大家組織到職場手足嘅時候,可以先諗一啲簡單嘅行動,如:約埋戴口罩返工、多準備幾個口罩俾同事、送啲「香港加油」紀念品俾同事,以致公開放口罩喺公司等等。

當然大家要按照自己職場手足嘅接受程度、公司打壓機會而調整行動方式。

如果你公司本身就係有一班潛在嘅黃絲管理層(唔好忘記喺明報十月中嘅民意調查,有88%支持法定獨立調查、73%認為林鄭應該引咎辭職、81%要求重啟政改),大家不妨試探吓公司會唔會有好大反彈。另一邊廂,如果你嘅公司係中資,大家嘅簡單行動就要更慎重,提防對家係你哋未成形之前就打散你哋﹗

要組織職場手足,呢一步係頗關鍵,行得太快太前,會令組織咗嘅手足卻步,誤判形勢仍有機會換嚟打壓﹗大家宜謹慎﹗

【組織職場手足(四) 進一步組織】

呢場運動發展到今日,無任何人再可以䄂手旁觀,不過大家可以就自己嘅底線去點樣支援運動。如果你想組織手足,就更加要諗大大小小、唔到程度嘅行動俾大家參與,以下係三個唔同方向,大家可以考慮:

  1. 改變淺藍:大家可以用茶水間戰術,藉由同事之間嘅聊天,將政權腐敗、警察濫暴嘅行動傳開去,「我有個舊同事企係條街都俾人拉」、「尋日啲警察係我樓下亂放彈,搞到我屋企人好辛苦」……唔好睇小姨媽姑姊嘅力量,要改變公司嘅淺藍。
  2. 約埋淺黃:淺黃往往係和理非為主,佢哋本身就支持運動,不過我哋要佢哋支持變成更具體嘅行動,所以大家真係可以約埋一齊去朝早「和你返工」、放工之後嘅商場行動等。
  3. 堅實深黃:見到職場深黃,大家就更加要攬實佢哋,因應自己能力同埋職業嘅專長,諗下係咪可以一齊組織快閃、重建公司附近嘅連儂場、一齊做家長等等,例如:教育界嘅朋友可以諗為DSE嘅小朋友補習、音樂人喺安全情況之下可以做快閃(家下警察玩樂器都唔俾,喺條街大聲beatbox、唱歌又唔知得唔得呢?)

另外,除咗以上行動之外,大家亦要密切留意整個公民社會動向,探討同事之間對各種行動升級,如罷工等嘅反應,拆解佢哋嘅誤解,就佢哋嘅擔心思考解決方法,並且get ready配合﹗

【組織職場手足(五) 組織工會】

行動升級,志在必行,呢場運場唔會喺短時間內完結,為咗長遠嘅實力提升,增強同維繫固有嘅力量,無論係街坊、職場、手足都要全民組織。

喺職場上,大家組織工會,有以下三個原因:

1. 更規模地組織

長遠而言,我哋難以再用即興方式組織行動,必須更有策略咁俾壓力政府,而採取嘅行動亦需要更加具體、有規劃。而工會正正係一個可以將光譜相近嘅人聚集起嚟嘅平台,一齊諗行動、做呼籲,吸納理念相近嘅手足,壯大自己力量。同時,當大家知道一旦秋後算帳嘅時候,其他手足都會為自己發聲,相互支援,都會更安心。

2. 判斷實力

無論係咩行動,最理想都係可以事前掌握到參與人數,知道自己有幾多籌碼,再調整下一步。民間社會正推動罷工,罷工確實係對準政權,癱瘓經濟令政權無法迴避民意,不過罷工亦令打工仔憂飯碗不保,所以唯有確定有足夠嘅人數(全公司九成人罷工,老細,你炒哂我哋,就執笠啦﹗),先可以令大家安心,工會自然更具體咁了解行業或者公司入面嘅形勢。

3. 建立罷工基金做後盾

有機會突然失去財政收入,大家難免有顧慮,如果組織咗工會,可以考慮籌備罷工基金,形式可以係撥入部分會費、眾籌等,以致罷工期間有津貼,令大家安心一啲,當然補貼多少,就要視乎人數、資金來源等等。

你話長遠組織難唔難﹖難呀﹗不過面對一個腐敗政權,我哋無路可退﹗香港人﹗反抗﹗職場組織,由呢一刻開始﹗