記2021年五一:五一戰友發言

醫管局員工陣線David:香港人先至係香港嘅主人

一個城市嘅離去因為大眾捨棄,一個城市死去因為大眾嘅冷漠。拒絕沉默,堅守專業,道出真相,唔係因為有技能,而係因為有責任。Winnie(醫管局員工陣線前主席余慧明)曾經講過,「與其悲觀地過,倒不如笑著面對,只想大家記著成立工會初衷。」活在真實當中,勇敢負重前行。「香港人先至係香港嘅主人」。

 

Carol 航空界戰友Joe:港龍無咗,工會都有完結嘅一日,但唔好妥協,唔好忘記要做嘅嘢

我係兩個仔嘅媽媽,Carol教我想幫人嘅初心係最重要,呢一刻香港人承受好大壓力,但唔好忘記要做嘅嘢。港龍無咗,工會都有完結嘅一日,但我會以Carol繼續作為model,多啲去諗,唔好去妥協,多啲寫信比Carol,I love you all。

Carol 航空界戰友 Erika:我每晚都問自己係咪需要堅持落去,我仲堅持緊,你有無啊?

我無資格做Carol徒弟,因為我當選國泰工會主席後好快已經比人炒咗。但任何一個香港一個香港人都有能力做到自己嘅嘢,唔識寫信無問題,你可以寫任何嘢入去。 Carol獄中依然關心航空界每一個人。「放棄只需一秒,堅持卻需一世」,我每晚都問自己係咪需要堅持落去,我仲堅持緊,你有無啊?

香港政府可以打壓任何嘢,街站、言語、遊行,但都無法打壓我哋嘅初心同思想。牆內嘅人都無放棄,希望大家都係,在黑暗之中,係嗰一點光。

李卓人太太鄧燕娥(娥姐):我都好希望大家可以掛念佢,相信佢個心同我哋係連埋

我四月三十日去咗探阿人,佢好掛住五一,佢好想做啲嘢,想知道今日嘅活動情況係點,亦都好想我哋順利盡行。我知道呢一刻佢個心係同我哋一齊。我剛才早咗嚟到,一齊派傳單,都好多市民有去接。可能只係一個小動作,但對我嚟講係一個好大嘅鼓舞。

佢好鐘意睇信,亦都好多人寄書比佢,拉筋,做瑜珈等等嘅資訊都好有用。佢好掛住職工盟、工黨、支聯會。對佢嚟講呢一啲都係佢嘅家人,我都好希望大家可以掛念佢,相信佢個心同我哋係連埋,只有咁樣我哋未來先至充滿希望。

職工盟執委鄧建華:所謂既負重前行,就係佢哋付出犧牲後我哋要盡做,而唔係留係舒適圈。

勞動節可以做嘅嘢真係唔多,發動工會留下來的人一齊去擺街站,希望大家嚟到呢度記得三位參加初選而在獄中嘅三位工會人。希望大家可以寫信比佢哋,記得佢哋嘅付出。Carol航空界嘅工作,啟發好多航空界嘅從業員,在自己身位盡做。Winnie 發動嘅罷工可以話係主權移交以嚟最大嘅一次罷工。阿人係民主運動上邊,連結唔同派別嘅一個人。佢哋三個不但只係工運領袖,更加係啟發香港好多人,民主運動其中一個重要嘅一員。

職工盟總幹事蒙兆達:只要我哋無放棄,我哋會繼續做埋佢哋果份,唔會放棄,永不休戰,直至理想達至。

雖然被分隔,但監獄不能阻隔共同奮鬥的理想,無論高牆有幾高,只要有信念,係阻唔到我哋嘅團結。只要我哋無放棄,我哋會繼續做埋佢哋份,唔會放棄,永不休戰,直至理想達至。警方用限聚令為借口,第二年禁止我哋上街遊行。今日我哋繼續係街頭,與市民肩並肩,有30幾個街站。無論面對幾黑暗嘅黑夜都要堅持講真話,守住我哋公民社會底線。