勞動節二千五人上街撐「勞動尊嚴」

撰文>余秋婷

 

每年五月一號都係打工仔女嘅大日子,而職工盟亦會組織大型嘅遊行,就每年嘅勞工議題發聲。特首選舉啱啱完結,勞工議題被受忽略,而新任特首林鄭月娥即將上任,可惜對於標準工時、取消強積金對沖、全民退保以及劃一勞工假都全無承諾。

 

今年有超個2,500打工仔女參與遊行,來自近40個工會,捍衞工人權益,沿途大叫「五一勞動節 工人大團結」、「沒有集體談判哪有公平分配」、「標準工時企硬,合約工時衰硬」等口號,參與者亦絞盡腦汁,加入創意,以特色裝扮、道具去表達訴求。大會製作了三隻分別以手遮眼、耳、口嘅林鄭「馬騮」,諷刺林鄭做「馬騮戲」,同時又指她對勞工訴求「眼不見、耳不聽」又無承諾。


建築地盤職工總會製作咗「港珠澳奈何橋」,同埋戴上工人帽嘅血染十字架,批評政府一直忽視職安問題,以致前線工友面對種種職業傷亡,以生命換取基建;亦有飲食及酒店業職工總會以飲食界議員張宇人嘅頭像造成箭靶,又貼上蝙蝠翅膀,諷刺老闆吸盡工友嘅血汗權益,亦有示威者打扮成老佛爺同埋聖誕老人,期望劃一勞工假。


其實職工盟於遊行前夕就已經舉行記者招待會,以數據說明打工仔女之苦,自2003年至2016年間,通脹升幅達44%,而僱員一直以嚟嘅累計工資增長就只係得42%,其實打工仔嘅實際工資根本無變,再比較每年人均生產總值亦有5.7%,而工資嘅每年平均增幅就只得3%,由此可見,僱員根本分享不到經濟成果,所以工人更加要團結一致,為自己權益爭取。明年五一,繼續上街!